संघर्षनायक वृत्तसेवा दौंड(ता.२३)
२८ सप्टेंबर हा दिवस माहिती अधिकार दिन सर्वत्र साजरा करावा अशी मागणी माहिती अधिकार कार्यकर्ता महासंघाच्या वतीने निवेदनाद्वारे विभागीय आयुक्त, जिल्हाधिकारी , मुख्य कार्यकारी अधिकारी यांसह जिल्हा प्रशासनाकडे करण्यात आल्याची माहिती राज्य कार्यकारिणी सदस्य राहुलकुमार अवचट यांनी दिली.
माहितीचा अधिकार अधिनियम २००५ हा कायदा देशभरात सन- २००५ पासून लागू करण्यात आला असून, शासनाने वेळोवेळी उचललेल्या पावलांमुळे अल्पावधीतच राज्यात हा कायदा लक्षणीय स्वरुपात लोकाभिमुख झाला आहे. महाराष्ट्रात माहितीचा अधिकार अधिनियम-२००५ या कायद्याच्या व्यापक प्रसिध्दीसाठी व प्रभावी अंमलबजावणी करीता शासन स्तरावरून सर्वतोपरी उपाययोजना करण्याची मागणी माहिती अधिकार कार्यकर्ता महासंघ महाराष्ट्र राज्य यांच्यावतीने प्रशासनाकडे निवेदनाद्वारे केली असुन
२८ सप्टेंबर हा आंतरराष्ट्रीय माहिती अधिकार दिन असून कायदयातील तरतुदी, कार्यपध्दती, विविध माध्यमातून व्यापक प्रसिध्दी देऊन व विविध उपक्रम राबवून जास्तीत जास्त नागरिकांपर्यंत पोहोचविण्यासाठी शासनाने २८ सप्टेंबर हा दिवस माहिती अधिकार दिन शासनाच्या निर्देशानूसार साजरा करण्याची मागणी करण्यात आली असून याबाबतची निवेदन विभागीय आयुक्त पुणे विभागचे उपायुक्त अण्णासाहेब चव्हाण, जिल्हाधिकारी सुहास दिवसे , पुणे जिल्हा परिषदेचे मुख्य कार्यकारी अधिकारी संतोष पाटील यांसह पोलीस आयुक्त, राज्य माहिती आयुक्त पुणे खंडपीठ, महानगरपालिका आयुक्त यांच्याकडे देण्यात आले आहे.
शालेय शिक्षण विभाग तसेच उच्च व तंत्र शिक्षण विभागाने सर्व शाळा, महाविदयालये, विदयापिठे व इतर शैक्षणिक संस्थामध्ये माहिती अधिकार या विषयावर आधारीत प्रश्नमंजुषा, चित्रकला.. निबंध व वक्तृत्व स्पर्धा तसेच चर्चासत्र व व्याख्यानमाला आयोजीत करावी यासाठी अशासकिय समाजसेवी संस्थांचा सहयोग घेण्यात यावा. हा उपक्रम व्यापक पातळीवर जनसामान्यांना त्यांचे न्याय व अधिकाराबाबत माहिती होण्यासाठी माहिती अधिकार कायदा प्रभावशाली ठरत असून सर्वच शासकीय कार्यालयांमध्ये दरवर्षी २८ सप्टेंबर हा माहिती अधिकार दिन म्हणून साजरा करावा यावर्षी २८ सप्टेंबर रोजी शनिवार व २९ सप्टेंबर रोजी सुट्टी असल्याने सदर माहिती अधिकार दिन २७ सप्टेंबर किंवा ३० सप्टेंबर या दिवशी साजरा करावा याबाबतच्या आपल्या अधिनस्त सर्व शासकीय कार्यालयांना याबाबतच्या सूचना कराव्या अशी मागणी निवेदनाद्वारे करण्यात आली आहे. यावेळी माहिती अधिकार कार्यकर्ता महासंघाचे अनेक पदाधिकारी उपस्थित होते.
पुणे जिल्ह्यातील सर्व तालुकास्तरीय असणाऱ्या तहसील कार्यालय, पंचायत समिती कार्यालय, भूमी अभिलेख कार्यालयांसह इतर शासकीय कार्यालयाने देखील माहिती अधिकार दिन साजरा करावा असे आवाहन माहिती अधिकार कार्यकर्ता महासंघाचे राज्य कार्यकारणी सदस्य राहुलकुमार अवचट यांनी केली आहे.
Discussion about this post